Kua pō te ao! Kua pō te ao!
Kua pō uriuri, te ao taketake!
Kua puta a Aituā i Whiti-nuku ki Whiti-reinga
Tūātia ana, whakawahia rā hei kaitiaki o te mate
Hinenuitepō! Hei āhea mākona ai tō matekai?
E te tawhito e Tamati, e moe!
Kei te ruānuku e Hirini, okioki ai!
E te hīnātore e Whatarangi, takoto!
Kōriorio ana ngā tōtara haemata o te ngahengahe
Pīngongo ana te kāhui taumata okiokinga
Kei te korokoro o te parata te puna mātauranga Māori
Toreke mai he iwi pōkaikaha, e rapu kau noa i te urupare
Kāti! E te kāhui mūrau o te whakatuatea me te whakaiti
Tē ware nei tā koutou pātaka kura huna i puta ao mārama ai
Māhue mai a ngai Māori i te kauanuanu i te ngākau whakaute
Tangitangi ana te motu, ka tangi hoki a Ngā Pae o te Māramatanga
Pou Matarua | Co-Director
- Professor Tahu Kukutai
- Professor Melinda Webber